子華神。
無啦啦可以對住子華神四、五日，仲可以免費睇住佢度嘢，賺返晒。
同上個Post講嘅Expedia一樣，今次幫DBS做嘅campaign，都係由零開始。從傾方向、傾代言人、諗Slogan、做電視廣告、做平面廣告、做網上廣告、文案、美術、砌景、砌特效、砌keyart....等等，都係由我哋搞晒，好有挑戰性..
【子華度嘢篇】
首先感激子華同經理人May姐嘅參與。
今次唔止拍攝咁簡單，仲意外地同到子華度嘢（正確嚟講係見證佢即場度嘢）。
源起係，子華都算好信我哋，OK晒大部份Creative，只係對網片份Script其中一段「子華Solo」有猶疑。於是第一日開會時大家要一齊度下點改，第一次見到子華神，我基本上只係全程扮諗，實際上係望住佢諗。咁總之我哋收到子華意見，返去再寫過。到第二次見子華神，即係拍攝電視廣告嗰日，我哋又再將第二稿交畀子華，但可想而之，又Fail咗。於是嗰日一唔洗埋位，我哋又一齊度下又各自度下咁，咁想當然我又係扮諗，實際上係望住佢諗。咁總之我哋返去再寫過第三稿，今次好有信心（其實冇），準備第三次見到子華時，即係影相嗰日交畀佢，點知……嗰日一見到佢，佢就帶一點興奮地說：「你喺度就啱，我尋日寫咗個，我覺得今次得㗎喇，我講畀你聽。」然後佢就即席表演咗一次迷你talk show，我哋聽完之後，係好似網片入面班人咁呆咗，然後掌聲唔該。再然後，我話，我哋都寫咗，但睇嚟可以掉咗佢了，再再然後，我默默咁收返埋原先預備畀子華的稿。所以，「四個咁」，係出自子華手的（佢兩張手稿我哋已自己私藏，非賣品）。
【勇敢客戶篇】
多謝DBS Rebecca、Christina、Lorain、Karman、Candy、Coey、Amy，繼上次古天樂Black Card之後再搵我哋合作，敢搵我哋做銀行認真TVC，有商有量又互相信任，抵你哋再次生意翻幾翻，每次聽到好消息時我同同事都好開心。
【爆肝同事篇】
講開我公司同事，Sorry我忍唔住又要講喇我，求其講啲啦。首先係特效部（其實好似得一個人），做親啲後期特效都好勁，尤其今次TVC啲「卡雨」，真嘅一樣；之後設計部，不嬲都勁，個keyart好有型；美術部同製作部嚟講，Set場Set景能力又叻咗，今次佢哋由零開始搭個報案室出嚟，真係好像真，遲下有機會先再分享。仲有d演員，尤其黃慘盈、崔健芒、龍志權，d演技非常浮誇，極度失真，過晒火位，非常好。當然仲要有水牛幫手影相；Martin小林幫手拍條網片；Vincent、小龜、阿larn幫手拍個tvc，我哋次次都係要求多多捽嚟捽去，辛苦晒大家配合。仲有…要十萬個感謝神秘華神。
【死黐集郵篇】
某次拍攝現場，子華度嘢，我扮度嘢。
Search